واخيراً بعد انتظار طويل من يوم اعلان ابل عن طرح الايباد في الاسواق وانا انتظر هل اليوم اللي اكتب فيه تقريري عن الايباد .
قصتي مع امتلاك الايباد طويلة، فيها اكشن، غرام واحلى مافيها انها انتهت سعيدة.
اول شئ قصة شحن الايباد الطويلة العريضة باختصرها في نقاط :
- ١٨ مارس: طلبت الايباد من امريكا عن طريق موقع Myus.com
-٣ ابريل: نزل الجهاز في امريكا بس ما وصل لشركتي!! (بحجة ان ابل سحبت علي واجلت ايبادي اسبوع)
-١٢ ابريل: لسا ماوصل جهازي واكتشفت ان الموقع صار يوزع الاجهزه اللي توصل على الزبائن الحبايب والجديديين الله يخلف عليهم فأظطريت اني اكنسل الطلب.
- ١٢ ابريل: توجهت لحراج الدنيا:) ebay.com وطلبت الجهاز من عندهم في نفس اليوم اللي اعلنت ابل تأخير طرح الجهاز عالمياً.
-١٣ ابريل: الطيران الاوربي انشل لمدة اسبوع بسبب بركان اسمه صعب في ايسلندا.
- ٢٢ ابريل: وصل ايبادي العزيز لمطار هيثرو في لندن
-٢٦ ابريل: كلفو على روحهم الشباب في parcelforce ووصلو جهازي لريدنغ ( وريدنغ تبعد عن لندن نص ساعه وان كثرت ساعة مو اربع ايام!!)
-٢٧ ابريل: هبلو فيني ومالكم في الطويلة الين مارحت بنفسي واستلمت الاطخم الجميل اللي في الصورة.

وصل الايباد، وبكل اختصار هو تماما كما وعدت ابل، خرافي بكل شي فيه، مميزاته الي اعتقد الجميع ان ابل بالغت فيها واضحه من اول دقيقه استخدام، سهل، واضح وبعد كم دقيقه عليه تحس ان كل الانترنت وجد على شان يستخدم على الايباد، كل المواقع المشهورة ( من بينها موقعي ) شكلها خرافي علي الشاشة العجيبة في الايباد. طبعاً الجهاز ماهو كامل وفيه عيوبه وبذكر الي صادفني منها.
تركيب الجهاز وتشغيله وتظبيط كل شي فيه شغلة دقايق وانت خالص ( باستثناء تحميل ٤٥٠٠ اغنية هذي يبيلها وقت شوي ).
كمية البرامج الموجودة للجهاز حالياً ممتازه، واضح ان الجهاز يتحمل الكثير الكثير اكثر من قدرة البرامج الموجودة عليه، يعني بأستثناء جودة الصورة العالية الى الان ما شفت برنامج وقلت انه مستحيل يستخدم على غير الايباد.
بطارية الجهاز ممتازة جدا والسته الى عشر ساعات اللي اعلنتها آبل صحيحة ميه بالمية، طبعاً بحكم اني في فترة اختبارات ماحصل لي اني استخدمه ٦ ساعات متواصلة بس بجرب واعلمكم

عيوب الجهاز الأولية، انه ادمان p:، على الرغم من صغر حجم الجهاز الا انه اكبر من انك تمسكه بيدينك الثنتين وتكتب بنفس الوقت، واجهتني كم مشكلة في الايبود خصوصا بعد تحديث الاغاني عن طريق ايتونز ماتظهر في الايباد الى بعد ما اعيد تشغيله، ظهر الجهاز حساس جداً وواضح انه خلال اسبوع او اسبوعين بدون غطاء راح يتمخش ويتحكك لين يقول بس.
اكثر شي اعجبني في الجهاز غير التصفح الرهيب، الالعاب الموجودة جميلة بشكل مذهل، واغلب الالعاب الي استخدمتها سابقاً علي الايفون (FieldRunners, Flight Ctl وغيرها) خرافية بشكل عجيب .
بعد تجربتي البسيطة مع الايباد، اعلن رسمياً غرامي وعشقي وهيامي في ستيف جوبز واشكره من كل قلبي على التحفة التكنولوجية الفنية الرائعه الي قدمها للعالم.
خلال الايام الجايه ان شاء الله بكتب تدوينة عن احلى البرامج اللي اعجبتني ( من كثرها لازم تدوينة مستقلة لها).
بالاخير، اذا كان الايباد ما اعجبك قبل ماينزل، او طاح من عينك بعد ماشفته ….. ماعندك سالفة!! واذا ناوي تشتري ايباد ومحتار بالسعة اليي تطلبها، فلاتحسب الا حساب الاغاني، لانه في كم برنامج يغنونك عن نقل الافلام للايباد والكتب احجامها صغيرة عادة.

في سماء آبل نلتقي D:
ملاحظة: تم اضافة تصنيف خاص للiPad لاني احس اني بكتب كثير عنه ويمكن الوصول لها عن طريق البنر في يمين الشاشة