اليوم السبت السابع والعشرين من شهر مارس ٢٠١٠ اصبح عمري رسمياً ربع قرن (٢٥ سنة احتياط للي مايعرف معنى قرن:)).

عادة الواحد في يوم ميلاده يرجع يقول وش سويت السنه الماضيه وايش بسوي السنة الجايه، بس ماراح اكتبها هنا لانه احس انه مو لازم كل الناس تدري .

المهم في الموضوع علشان ما اتحمس قررت اني اجمع لسته فيها ناس نجحوا ودخلو التاريخ وهم في عمري او اصغر ( بس علشان احطم نفسي).

الصحابي الجليل اسامة بن زيد قاد جيش المسلمين وعمره ماوصل العشرين سنة في حرب المسلمين مع الروم،، ٢٠ سنه!! (وقتها ماعرف العاب الحرب على السوني اصلاً)

الاخ القديم اللي في الصورة هو ويليم لورانس براغ، الاخ اللطيف في عام ١٩١٥ حصل على جائزة نوبل للفيزياء لشي ماعرفت اترجمه (analysis of crystal structure by means of X-rays).

عمره ٢٥ سنه

الجميل هذا هو مارك زوكربيرغ، اللي مايعرفه ماعنده سالفه في الحياة لان الشخص هذا هو من اوجد الفيس بوك وثروته تقدر ب ٧٠٠ مليون دولار$$$.

عمره ٢٣ سنة .

بليك روس، احد مؤسسين شركة موزيلا ( المطور لمتصفح الفايرفوكس). الحبيب ثروته بس ١٢٠ مليون دولار. وعمره بس ٢٢ سنه:)

المملوح هذا هو مات مولينوج، مؤسس اكبر خدمة تدوين في العالم وهي الوورد برس Word Press. طبعاً ماهو اغني من الاثنين اللي قبله مسيكين ماعنده الا ٤٠ مليون دولار بس لسا قدامه العمر كله توه ٢٣ سنه.

الزبدة ان اللسته طويله ولقيت حوالي ٣٠ شخص ثروتهم فوق ال١٠ مليون وعمرهم تحت ال٢٥ سنه، وانا الله يخلف لا اخذت نوبل وحسابي فاضي.

السنه الماضيه كانت حلوة وتعرفت فيها على ناس عسل، وتعلمت اشياء كثيرة فيها وان شاء الله السنة الجايه بتكون احلى بس برضو ما اخذت نوبل وحسابي مافيه لسا فاضي..:(