فرويد والشخصية السعودية

(الشكر لاخصائية نفسيه على تعديل ترجمة المصطلحات للعربي لماهو باللون الاحمر:))

نظرية الشخصيةنظرية مفهوم الذات (Self-Concept Theory)تعتبر وحدة من اهم النظريات في علم النفس لتحليل شخصية الانسان . هذه النظريه هي احد افكار العالم النمساوي سيجمند فرويد. الفكرة الرئيسية في هذه النظريه ان فرويد قسم شخصية الانسان فيها لثلاثة اقسام تعمل بين الوعي واللاوعي في عقل الانسان.


الثلاثة اقسام في هذه النظرية زي ماتشوفون في الرسم اللي فوق اللي مترجم بالعربي والمصطلحات ترجمتها من راسي (وفقاً لما يناسب الموضوع:)) هي الشخص الهو (ID)، المجتمع الانا الاعلى(Super-ego), الشخصية الانا (Ego).

النظرية هذه قديمة وعلماء النفس حللوها ودرسوها لين ماقالو بس. اللي يهمني في هل النظرية ان فرويد يقول فيها ان الاقسام في هذه النظرية ماتعمل لحالها ابداً وان كل الثلاث يعملون مع بعض. حاولت اطبقها على المجتمع السعودي وقدرت بكل فخر اني اغلط فرويد بانه ممكن انه فيه ناس مايشتغل عندهم الا واحد من هل الاقسام.

الجزء الاول هو الشخص الهو(ID),  بتعريف فرويد لهذا الجزء يقول ان الشخص بطبيعته اناني يهدف الي تحقيق اهدافه الشخصية فقط، طماع، غير منطقي،يسعى الي تلبية غرائزة الداخلية فقط. افكار الشخص وتصرفاته دائما ماتكون في اللاوعي ( لا ارادية) وتكون موجودة مع الشخص من يوم ما يولد.

هذا الجزء يعطينا تفسير كامل لشخصيات بعض الناس في بلدنا اللي ما عنده اي مشكله في انه يرمي زبالته من سيارته في الشارع ولا همه( الانانية ) واهم ما عليه انه سيارته ماتكون وسخة ( تحقيق الاهداف الشخصية). وتفسر لنا كيف انه بعض الناس اخر همها الطابور على شباك البنك او مكينة الصراف او الدائرة الحكومية او حتى محل التميس اهم شي يخلص بسرعه (طماع) حتى لو تأخر المسكين اللي في اخر الطابور ربع ساعه عادي وش وراه انا مستعجل( غير منطقي) رغم اني ابصم على العشره اننا من افضى شعوب العالم. يعني وش مستعجل عليه مثلاً صكت بلوت، تقرا جرايد في مكتبك!!. واللي يثبت هل النظريه اكثر واكثر انها فعلاً تحدث في حاله اللاوعي ولا ارادياً في الانسان لانه بعد كل هذا يدخل زعلان ومتضايق ويقول يلعن هل البلد والشعب المتخلف ياشيخ وكأنه من ابناد المدينة الفاضلة!!.

الجزء الثاني هو المجتمع الانا الاعلى(Super-Ego).  اخينا فرويد عرف هل الجزء بانه الافكار والمبادئ والقيم اللي نجمعها ونتعلمها من الناس اللي حولنا من المجتمع ومن الثقافة العامة للبلد وهذا الجزء هو على العكس تماماً من الجزء الاول (الشخص). فهو كريم فوق اللازم يسعى للقبول الاجتماعي اولاً ويقدم مصلحة الغير على نفسه. والشي هذا يحصل في نطاق الوعي الكامل للشخص.

يعني المراسل المسكين اللي راتبه مايتعدى اربع الاف ريال وديونه مغطيه راسه يلقى نفسه مجبر على ذبيحة بالف ريال كل ما زاره احد من الجماعه. والعاطل الفاهي الي كل ثلاث شهور يتسلف من خويه الموظف علشان يدفع قطة الاستراحة،والشاب اللي يكبر مستحقر لدور امه واخته في المجتمع لانه من يوم هو بزر وابوه يقول له انت رجل البيت ( وهو اصغر واحد في البيت مايعرف يلبس ثوبه بدون امه). لو تسئل اي واحد من هذولا بيقولك انا اعارف انه مو منطقي اللي نسويه بس وش نسوي المجتمع عاوز كده، والجنة تحت اقدام الامهات بس تعرف اسم امي ياويلك!!.

الجزء الثالث هو الشخصية الانا (Ego), وظيفة هل الجزء انه يوفق بين الجزئين الاول والثاني، بين الرغبه في اخذ اكبر قدر ممكن من الناس والرغبه في اعطاء اكبر قدر ممكن للناس، بين الانانيه والكرم الغير منطقي، بين احتقار ناس واحتقار النفس.

فلو افترضنا ان السعوديين كلهم متوفره فيهم الثلاث اجزاء كان كل شي حلو :) ، لكن لو مافيه الا واحد من اصل عشره فيه هل التكوين يعني انه المسكين بيوقف في الطابور ولا راح يجي دوره ابد، راح يضف زبالة نص شوارع الرياض وكل اللي بيلقاه من الناس ( عسى ما شر يابو الشباب!!). ولو فكر انه يقول لولد عمه والله وانا اخوك خويك مطفر وماقدر على ذبيحه وش رايك نقضيها نواشف بيلقى نفسه بعد فترة الحقير قليل التربيه اللي مايعرف السنع ولا سنوم الرجال.

انا هنا ما اعمم على كل السعوديين ولكن متأكد ان اي سعودي بيقرا اللي كتبته بيعرف انا عن مين اتكلم، واذا سبحان الله ماعجبك كلامي وودك تشكك فيه بعطيك اسهل سبب.

سيجمند فرويد يهودي ونظريته هذي هي جزء من المؤامرة الغربيه الكبرى لاسقاطنا :)

Share
    • بدر الرميحي
    • مارس 26th, 2010

    ياسلام يامستر ريان ….. سؤالي هو وين تصنف المتدينيين اللي ماعندهم الا علمنه ولبرلة العالم ؟؟؟

    متابع لكل جديدك والى الأمام :)

    • ريان
    • مارس 26th, 2010

    والله يا بدر التدين شئ والتطرف شي، التدين بمعناه الصحيح الالتزام بتعاليم الدين شي جميل وعلى نظرية فرويد المتدين يرضي نفسه والمجتمع بشكل رائع.
    لكن التطرف (بكل اشكاله) لليمين او اليسار، للدين او الليبرالية بحد ذاتها خلل في التفكير. لانه مجرد تعصبك لرأي على حساب اخر معناته انك وقفت التفكير واهديت عقلك لرواد الفكر اللي تتبعه ليفكروا عنك بعدين يصدي مخك ويغبر زي يوسف الاحمد وهدم الحرم!!
    مشكور بدر على تواجدك الدائم

    • اخصائيه نفسيه
    • مارس 27th, 2010

    السلام عليكم

    تصحيحااخطاءك
    اولا النظريه مو اسمها نظرية الشخصيه (Self-Concept Theory اسمها نظرية مفهوم الذات !! بما اني خريج psychology
    Super-ego هو الانا الاعلي بالعربي وليس المجتمع بذاته
    و الانا هو ال ego وليس الشخصيه !! وال ID بالعربي (الهو) وليس الشخص !! وهذه الاقسام الثلاث هي تندرج تحت شخصية الانسان او بما يمسى ركائز الشخصيه
    وليس كما قسمتها
    فرجاء اتأكد قبل من معلوماتك قبل ماتضعها !!
    ارجو عدم حذف الرد لانه عباره عن تصحيح معلومات

    • ريان
    • مارس 27th, 2010

    احذف ردك!! ليه احذفه… ردك هو ما ابحث عنه، انا طالب في علم النفس وادرسه باللغه الانجليزيه وترجمته للعربي بالنسبه لي مستحيله فحاولت اني ابسط المصطلحات لما يناسب الموضوع. وما اكذب عليك ماعرفت انه هذي ترجمتها الا منك وانا ذكرت في بداية الموضوع ان الترجمه والمصطلحات من راسي:).
    قرائتك للموضوع ونقدك له يدل على اهتمامك، والشي هذا لازم اشكرك عليه:)
    (تم تعديل المصطلحات في الموضوع الاصلي)

    • Rawan k Al-Wabel
    • مارس 28th, 2010

    من يوم هو بزر وابوه يقول له انت رجل البيت ( وهو اصغر واحد في البيت مايعرف يلبس ثوبه بدون امه).
    (Y) :)

    • ريان
    • مارس 28th, 2010

    @Rawan k Al-Wabel
    شاكر تواجدك الدائم روان :)

  1. No trackbacks yet.