آلو آلو.. صوتي حلو. والله اغاني اخر زمن!!
يقول الشاعر المخضرم:
تبي تحب واحد كيوت (Cute)
معاه رنج وساعه برجوت!!
والصيف ماعمره يفوت
باريس، لندن او بيروت
وفي قصيدة اخرى لاتقل ابداعاً عن سابقتها
يمشي كدا كدا الحلو يتمخطر
ينقط منه الحلا والسكر
ويفوح المسك والعنبر
ويلي ويلي ويلي من خده المرمر
الابيات العظيمة السابقة مأخوذة من بعض الاغاني المنتشرة حالياً بين الناس، اول ماسمعتها ضحكت سمعتها مرتين ويمكن ثلاث ونسيتها على انها اغنية (اي كلام) غناها واحد مسطل في ليلة ظلماء محد يدري عنه، ولكن تفاجأت لما سمعت انها تذاع على ام بي سي اف ام (بما انه الراديو الوحيد الصاحي في الرياض!!) واللي يزيد الطين بله انها في التوب ١٠!!!.
معقولة الناس لهل الدرجة خرب ذوقها، معقوله ماعاد فيه ناس تعرف تسمع!! وتفرق بين الاغاني الجميلة والنهاق!!
بنات اخر زمن، يمشي كدا كدا، خكرية خطيرة ومن قبلهم التاكسي والشرطي. ليه طيب!! يعني امنا بالله العرب في اسوء احوالهم الثقافية والحضارية ووووو بس لهل الدرجة!!
يعني مايكفي ان عبد المجيد وراشد تركوا الفن الجميل والطرب الاصيل وحولوا لأغاني استهلاكية تسمعها مرتين وتنساها!!
افكار كثيرة دارت في راسي وانا اكتب هل الموضوع ومن اي طريق ممكن اشرحه وماوصلت لجواب مثالي وبالتالي بعطيكم كل ما في بالي ولكم الخيار:
الانترنت والتقنيات الجديدة عطت اللي يسوى واللي مايسوى الحق في نشر اي خربطة حروف وانها تحول لاغنية وتذاع على نطاق اكبر من ام بي سي او اي قناة راديو!!
اللغة العربية الضحلة في ثقافة الشباب اليوم ( WTF= Wesh T7s Feeh ومثيلاتها!!) لدرجة انه مافيه احد يفرق بين البيت السليم والمكسور والقصيدة ورص الحروف
الناس ماعاد عندها وقت تروق على اغنية وتسهر على كتاب وكم اغنية رايقة وبدال كذا ٣ دقايق طبل وزمر تسمعها في السيارة وخلاص.
والتفسير الاخير، الشباب اللي غنوا هل الاغاني فاضين ماعندهم سالفة واللي تعجبه اغانيهم مثلهم فاضي والسوق عاوز كده!!
المشكلة الكبرى انه دائما مايقولون انه الفن هو دائما صورة للحضارة الموجودة مثل العمارة الاسلامية في الاندلس والشام والزخارف الاسلامية وتصاميم المساجد هي خير ممثل لحضارة حكمت العالم يوماً ما. لكن بكره بعد ١٠٠ سنة لو طلع مؤرخ عن القرن الواحد والعشرين وش بيقول!!.
اتخيل بيكون شي زي كذا:
مررت في العام الحادي عشر بعد الالفين بمدنية وسط الصحراء اسمها الرياض ويدلعها عشاقها ريو!!، بلد مزدحم بوسيلة نقلهم المفضلة مايسمونه موتر(سيارة)، جميع من في هذة المواتر يستمع الى اغاني تعبر عن حالهم ولعل ما لفت انتباهي اغنية قال الشاعر فيها:
يالتاكسي
خذني لها يالتاكسي
وبسكتك خلنا نمر ناخذ عطر رومانسي.
فسحقاً لهذا الشعب!! ولثقافته التي تحوم الكبد
هذه روابط بعض الاغاني النص كم للي حاب يشوف وين وصلنا!!
إنحدار مستوى ذوقهم نابع من إنحدار مستوى أخلاقياتهم!
وهذا يجر ذاك ! كلو رخيص !
الله يرحم أغاني فيروز ووردة وعبدالحليم وطلال !
أكثر مايغيضني لما يقولون لك نبي نستانس وكأن الفن الجميل والإبداع في أغاني ماتم ذكرهم كأنها تعني الكأبة أو الحزن!
@روان الوابل
كلامك سليم روان، وصحيح والله يقهر اللي يقول نبي نستانس وكانه يقول السخافة تناسبني اكثر وتوسع صدري:)
تحياتي
أهنيك على الموضوع,
و اسمح لي أشارك بهذه الأغنية:
http://song7.6arab.com/Rashed_alreesh.ram
@Rawan k Al-Wabel
هاه يله حتى راشد صار يخربط ريش وماريش:)
دعونا لانبالغ
هالنوعية شي مو جديد ابداً .. اللي فرق سهولة الانتشار ..
مؤديها , ومؤلفها , ومستمعها , كلهم يعرفون انها ” أزمة
وتعدي ”
وموجة وبتروح في حال سبيلها.. لكن مكسبها بيّن اذا ماصارت في
التوب تن صارت حديث المجالس , سمعت اللي , شفت
ذيك .. وهوبا انشهروا .. واللي بيذيع يتعامل
بمبدأ كل فوله ولها كيّال .. وانا كسبان لو حطيت ان مشي كدا
كدا ولا المزهرية ..
@عمر
انا ما اختلف معك ابداً بلعكس اوافقك الرأي تماماً في ان سهولة الانتشار والسعي للربح السريع هي الهدف من ورائها، كلامي انا عن ذوق الناس ليش حبتها!!
يعني انا اعرفك زين واعرف ذوقك بالاغاني، هل البومات هل الايام نفس اول!!
ما اتوقع اننا كبرنا على هل الاغاني على اساس لكل زمان دولة ورجال ولكن فيه فرق بين البومات عبد المجيد نفسه قبل عشر سنوات واليوم ومحد ينكر هل الشئ.
الاغاني هذي تسويقياً ناجحة جداً، السؤال ليه!!
هلا والله
صرآحة موضوعك جد شدني ..
أنآ أقولك ليه النآس صارت تساق لـ مثل هالتفآهآت !!
لأن الشعوب العربية بكبرها تآفهه !
ما فيهآ أحد صآحي إلآ 1 % !!
للأسف ..
والمشكلة أن سبب أنتشآر هآلتفآهآت في المجتمع العربي هو الأعلآم ..
ولآ ننسى أن الشعب هو الدور الأكبر في الموضوع !!
والله إني كل يوم أتمنى أني ما أنخلقت في شعب عربي ..
تمنيت أني أوروبيه .. أعيش بمجتمع رآقي ..
ولآ أني أعيش في مجتمع عربي يعرف الصح من الغلط بس ما يطبقه !!
اهلاً Do3a
اعتذر عن تأخري بالرد..
انا معاك ان الاعلام العربي هو السبب، لكن ليه الاعلام العربي قام بهذا السلوك ( الاعلام ماهو الا مرأه للمجتمع صدقيني)
يعني في يوم من الايام كنا نقول الاعلام هو جزء من المؤامرة الغربية علينا ولكن الوقت ( وجوال ابو كاميرا) اثبتوا انه هذا واقعنا وليس من بنات افكار الاعلام الغربي
نحن مجتمع عربي صحيح ، نعرف الصح من الغلط ماني متأكد منها ولكن لا يعني ابداً ابي اصير اوروبي.
دوري انا وانتي وكل من عرف الصح من الغلط ( اذا افترضت اني عرفته) اننا نعدل الوضع للصحيح ولا نستسلم ابداً هذا واجبنا…
تحياتي لك